蛙

在奧海城美食廣場之甜品屋(祇得一檔，應你唔會去錯！)，食左一個最不知所謂的刨冰，名為海南紅荳刨冰，睇售票處影出黎之圖片，見佢大大碟賣相又夠靚，收費$26，價錢都算合理，點知落單之後，但見製作之阿姐，望實張圖片一大輪，好猷疑咁想跟住來做，但份量又唔知幾多至係，見佢問其他人，個個都係唔知點攪，睇黎我真係第一個點叫厘款甜品。

前思後想諗左一大輪後，佢攞只裝茶杯之碟仔出黎，裝了少少少少....紅荳，幾粒涼粉，跟住再用另一細碟裝滿刨冰，睇黎似是要分碟另上了！我就即時提出抗議，話圖示唔係咁既款，她竟然話無大碟，祇能分開黎放，我當然唔收貨，提出要取消此單，佢即刻話可以換個大碟比我，叫我稍等，等左陣，新製作搬上來了，原來祇是將兩只小碟D野放埋一只小碟上，再用只大碟裝住兩只細碟，真係頂佢唔順，但見後面排哂長龍，祇好求其收貨！咁就收我26雞。

唔講外觀講番味道，話就話叫做紅荳冰，但數埋都唔見有幾多粒荳，粟米重多過紅荳，重有係落得糖漿太多太甜又多色素，再左轉右轉碟後D冰唔夠凍已開始溶化，唔夠一陣就溶哂變水，成幅水彩畫咁，睇見都唔開胃，想我再幫襯都好難勒！睇黎最低工資28蚊真係比多左佢！！